Flag Counter

upside.jpg Hosting at Sudaneseonline.com

اتصل بنا


 

واحد صحبي شديد من ايام الثانوي كان عندنا عادة حلوة شوية كان كل واحد فينا لمن يصاحب ليهو بت جديدة الا يوريها للتاني نظام (أنا حبيبتي احلى من حبيبتك) وكنا كل يوم قاعدين نطلع بعد الحصص من مدرسة الخرطوم الجديدة ونمشي للمواعيد البنعملا .. الأيامات ديك ما خلينا لا كفتريا لا بقالة لا موقف حافلات او باصات ما إستعملناهو .. كنا طواالي في حالة مواعيد مع (البلي) بتاع المدارس التانية .. الجديدة الثانوية بنات والعمارات بنات وعبد المنعم المتوسطة بنات وحتى مدرسة الثريا الإبتدائية بنات ما ريحناها وخلطنا منها برضو ..

ظروفنا بتاعت ما بعد الدراسة الثانوية خلتنا نفترق من بعض فترة طويلة جدا .. بالصدفة قابلتو قبل فترة وبعد السلام والسؤال عن الاحوال قعدنا نستعيد في أيامات (مجدنا ديك) صاحبي قام قال لي : بالمناسبة دي فرصة عشان اعرفك بي حبيبتي الجديدة .. عاينت ليهو بي إستغراب وقلت ليهو : إنت لسة ما خليت العادة ديك ولا شنو ؟ قال لي ما خليتا وهسي داير اعرفك على بتي دي !! والله تشوفا غزال بس .. قلت ليو : أسمع يا اخوي أنا الشغلة دي بطلتها بدري جدا والحاجة التانية انا زااتي ما فاضي عشان أمش معاك في نص النهارية عشان أتفرج على حبيبتك .. الكلام دا كان زمان لمن كنا طلبة ، هسي بقى ما عندي وكت لي جنس دا وانا زااتي شغال بالنهار .. قال لي : يا أبو النيز ياخ بطل الحنك وانا عارفك زول بكاي والله دي تعاين ليها غزال بس وأصلو ما تزح عيونك منها تاني .. إنت بس(أرحكاكا) معاي .. قلت ليو : شنو شابكني حبيبتي غزال وحبيبتي حصان ؟! أنا بالنهار ما فاضي لو بتعمل معاها مواعيد بعد المغرب أنا بجي عشان خاطرك لكن حا تكون أخر مرة .. قال لي هي بالليل ما بتطلع لكن حا أحاول أواعدا بعد المغرب .. قلت ليو أوكي يا فردة لمن تعمل معاها مواعيدك دي أديني تلفون عشان اشوف غزالتك دي !!

بعد كم يوم ضرب لي تلفون وقال لي أنو عمل معاها مواعيد بعد المغرب وممكن اجي معاهو عشان اشوفا .. قلت ليهو إنت مصر يعني ؟ قال لي أيوة مصر .. ياخي إنت لمن تشوف غزالتي دي بتقتنع بي أخوك .. قلت ليو خلاص حا أجي إنت بس ما تقفلا معاي تشبكني غزال وبطيخ بعدين أجي القى وشها عامل زي (وش الملاح) تجيب لي نفسيات ..
________________________________________
يوم المواعيد أنا إتجهزت للزول دا قلت فرصة يا أبو النيز تستعيد ذكريات الثانوي أيام الجهل والتسكع بين الأسابيع الثقافية في مدارس البنات ... مشيت غشيت صحبي دا ولقيتو قاشر قشرة أصلو ما شفتها قبل كدة .. فنلة كت لونا اظنو أحمر طوبي ومرسوم فيها هيفاء وهبي وبنطلون جينز لونو ظهري وفيهو ستة ولا سبعة جيوب تحت الركبة وفوق ليها (نظام جلكسات) وشاكي القميص (شانقو) فووووووووووووق قريب صدرو !! .. وشعرو مجلطو ليك بي دهن ولا مصيبة كدة لمن مدفقة وسايلة في جبهتو و (ورا) إضنينو ، مجرد ما ركب العربية وشميت الريحة الكابي منها رطلين في هدومو طوالي قعدت اقح وشعرت إنو الأزمة حا تقوم علي !! قلت ليهو دا شنو العاملو في روحك دا !! هسي دي خلقة زول ما شي يقابل حبيبتو الجديدة ؟؟!! ما كان ممكن تلبس حاجة محترمة شوية ياخ !! قال لي : يا خي انت مالك ؟ غزالتي دي بتحب الموضة وإنت ما بتفهم في الموضة الايامات دي !! قفلت معاي قلت ليهو كويس أركب خلينا نتخارج نشوف (حصانتك) دي حا تجي لابسة شنو كمان !!

دورنا مشينا لي واحدة من الكافتريات في شارع محمد نجيب ودي الحتة المواعدين بعض فيها .. مجرد ما وصلنا المطرة بقت تنقط !! والبت لسة ما جات .. قلت ليهو أها هسي العمل شنو ؟ قال لي كدي موبايلك النضرب ليها ! قلت ليهو جابت ليها (إستعمار) كمان ؟ يا زول أنا ما بحب نمرة موبايلي دي تظهر في اي موبايل تاني أمشي أضرب من محل الاتصالات داك !! صاحبنا مشى وجاني بعد شوية قال لي الموبايل ما بيرد ؟! قلت ليهو هسي العمل شنو ؟ قال لي بيتم قريب بي هنا نقوم نمشي ليها .. قلت ليهو أنت مجنون ؟ أنا مباريك من سنة دو حصل يوم مشينا لي بت في بيتا ؟ولا حدنا بس الكافتريات والمظلات ؟ قال لي يا خي بتكون حصلت ليها ظروف أو ما قدرت تجي عشان المطرة . كدي النمشي ليها .. صدقني البت دي غزال وبتخاف من النسمة خلينا من المطرة ..

الزول قفلا معاي لكن قلت النمشي نشوف (غزالتو) دي .. قلت ليهو شوف هنا أكلمك من هسي أنا بقيف بعيد بنتظركم إنت تمشي ليها وتجوني سرعة كويس معاك ؟ قال لي ما مشكلة أنا متاكد هي هسي بتكون راجياني قريب باب بيتم .. عاينت ليهو بغيظ .. قلت ليو سمح يا توم كروز .. النشوف ..

دخلنا شارع بيتم لقيت في بقالة في اول الشارع قلت ليهو أنا بنتظرك في البقالة دي أمشي وتعال سرعة ما تتاخر قبل ما المطرة تزيد .. بتاع البقالة طلعت بعرفو قعدت اسلم عليهو وفي نفس الوكت عاينت ناحية صحبي (المتشنط ) وهو ماشي على باب البيت بي قشرتو العجيبة دي .. الزول دا ماشي مشية زي الروبوت لأنو لو رفع يدو لي فوق ساي للسلام حا يبوظ منظر (الشكة) دا لو ما رمى البنطلون (الشاكيهو تحت حنكو ) !!

الزول بي كل ثقة ضرب جرس الباب (التقول بيت ابوهو) يعد شوية شوف عيني في حاجة كبيرة كدة زي (الصبة) جات ناطة من جوة البيت وقبضت ليك صحبي دا وبدون أي مقدمات (وقشطتو) ليك بونية رمتو اربعة أمتار لي ورا !! وشوف عيني الدهن ولا الحاجة الكان مجلط بيها شعرو لمن إتكشحت في ا########## .. عاينت للمنظر مخلوع وما مصدق قلت لي بتاع الدكان الزول دا مالو !! بتاع الدكان قال لي أوعى يكون الضربوهو دا صحبك ؟ قلت ليو ااي صحبي !! الزول دا منو ؟ قال لي صحبك دا الليلة يحلو الحلة بلة من التور دا !! عاينت للمنظر لقيت (التور دا) قابض ليك في صحبي دا وبيعمل فيهو عملية أنا أصلو ما شفتها ولا حتى في أفلام توم وجيري ديك !! (التور دا ) عامل بالضبط زي المصارعين اليابانيين في الحجم والضخامة وكان لابس ليهو سروال عريض وفنلة داخلية وبطنو لمن مدفقة قريب ركبتو .. ساموراي بس !!
________________________________________________________________________________
عمري كلو بتفرج على المشاكل والضرب البيحصل في الأسواق ومطالعات نهاية اليوم في المدارس ، لكن زي الشفتو قدامي دا أصلا ما قابلني ولا حا يقابلني !!
الساموراي دا رفع ليك صحبي المسكين فووووووق من رقبتو بي إيد واحدة و(تااااااااح) قشطو كف وهو معلق لسة في الهوا لمن أضاني أنا صنت !!!.. بعد شوية مسكو من كرعينو و(رحل) بيهو كدة في الهوا (نظام طوطحانية) وبعد تلاتة او أربعة لفات (فكا) كرعينو وصحبي دا طاير في الهوا ويلفلف زي الضقل بتاع (سكج بكج) وطاااخ خبت الحيطة بي راسو ورقد زي الحطبة !!

أنا لسة مخلوع قلت لي بتاع البقالة أرح نحجز الزول دا !! قال لي إنت مجنون !! زولك دا قبل كدة الحلة كلها ما حاشتو دايرنا نحن الاتنين نمسكو ؟! أمشي براك لو داير تحجزو ؟؟ عاينت لي جهة (الحلبة) وانا ما قادر إتصرف .. (وزولنا الساموراي كان بدأ يطبق في نظرية جديدة) ..قلت ليهو هسي العمل شنو ؟ الزول دا حا يموت بالطريقة دي !! بتاع البقالة بارد جدا قال لي : لا لا هو ما بيكتل ليو زول .. لكن أمكن يعمل ليهو عاهة مستديمة ولو صحبك دا محظوط بيطلع بي كسور وجروح بسيطة أو حاجة بالشكل دا !!

غايتو ما عارف لكن زولي دا في اليوم داك إتجيه جيهة تمام ..
أي نوع من انواع الدق أنا شفتو .. دق الحرامي في المولد ودق توم لي جيري ودق الجرتق ودق الدلجة ودق الريحة وكل انواع الدق المعروفة والما معروفة لي أي زول .. لكن زي جنس الشفتو قدامي دا تاني ما حا يمر علي أصلو ..

أنا أبشع منظر شفتو في حياتي كنت قايلو منظر دق( مل جبسون) في فيلم آلام المسيح لكن في اليوم داك عرفت روحي غلطان وأنا لسة جاهل في الدنيا دي وما شفت حاجة لسع !!

الوكت داك الساموراي كان قطع في صحبي كف مذدوج (بي يدينو الإتنين يعني ) من صوت الكفين أنا لمن ضروسي خلخلت !!

والشي العاجبني في صحبي إنو والله ثبت قدام التور داك (أي والله) الزول دا لا كورك لا صرخ لا إتحرك ولا إتنفس زاتو .. واقف زيو وزي أي بطل أسطوري قدام جلادينو .. بس ما عارف لحدي هسي هو ثبت قدام التور دا .. لمجرد الثبات ولا عشان هو ما قادر يعمل حاجة ولا عشان كان غمران ؟ أنا غايتو إفترضت حسن النية ونسبت ليهو البطولة ..

طبعا بعد ما بتاع البقالة حذرني قلت خلاص انا احسن اقعد في محلي وقعدت ادعو ربنا انو الزول دا يفتر من الضرب أو يكون متابع المسلسل يمشي يحضرا و(يعتق) صحبي المسكين دا .. لكن برضو كنت في دي غلطان !!

صاحبنا لا فتر لا كان متابع مسلسلة لا بطيخ

!! إستمر في مجذرتو وإنتهاكاتو لحقوق الإنسان في صحبي دا قريب النص ساعة وانا كل مرة بعاين للساعة ... وأسأل الله السلامة ..

بعد شوية الساموراي نفض صحبي دا من ا########## (قبل الحركة دي كان راميهو على ضهرو ونايخ ليهو في بطنو وشغال فيهو (هوكات) وكفوف ) قام مسك ليك الفنلة (الكط) المرسوم فيها هيفاء وهبي .. وبي جرة بسيطة شرط ليك وش هيفاء وهبي لي إتنين .. (والله ذكرني بس بي هوقن بتاع المصارعة الحرة ) !! بعد داك إستعدل صحبي بي بنية في بطنو.. ولمن داك دنقر جرا الفنلة الداخلية وشرطا برضو .. أنا في سري قلت هسي صحبي دا لو ما عبيط ساكت في داعي يلبس فنلة داخلية تحت ال تي شيرت المرسومة فيهو هيفاء وهبي !!

شلوت جا طاير فجأة كدة خلي صحبي يلف زي القرقور (وانا جد معجب بي صمودو ووقفتو الباسلة لأنو لو أنا في محلو كنت حا اكون في أحمد شرفي من الكف الاول داك) .. بعد شريط الـ تي شيرت والفنلة الداخلية الساموراي دا قبل على البنطلون وجراهو من تحت جرة واحدة (أنا مما سمعت شرررررررررررررررررط ) بتاعت الشريط طوالي عرفت إنو صاحبنا دا غشوهو وما ادوهو بنطلون الجنز الاصلي .. باعوا ليهو النوع البيجي من ليبيا بالتهريب وانا دا عارفو ما بيعيش كتير .. لكن الحمد لله الحزام الكان لابسو كان جلد أصلي لانو ابى ينقطع كلو كلو .. والله العظيم لو كان إنقطع كانت حا تكون مصيبة لانو بكل تاكيد اللباس الداخلي (البياري) ما كان حا يطلع اصلي وحا يتشرط من اول نفخة من التور دا ودي كانت حا تكون مصيبة تانية !!
________________________________________
________________________________________
غايتو بعد شوية ولي سبب أنا ما قادر افهمو التور دا رفع صحبي دا فوووووووق زي الرافع ليهو مخدة .. وفكاهو ناحيتي بي كل قوتو (إتخيلو المسكين طاير في الهوا قريب التسعة امتار) !! وخبت ا########## .. بعد داك الساموراي دخل بيتم وقفل الباب وراهو (بيكون ما شي يحصل باقي المسلسل ) !!
سرعة سرعة جريت على صحبي عشان اهنيو على الثبات والصمود دا وأوريو إنو ما في فرق بينو وبين ثبات حزب الله في لبنان .. وبالمرة كدة اعمل ليهو عملية (إخلاء) سريعة من ميدان المعركة .. غايتو لقيت صحبي عيونو مفتحة (وما مهم لوكانت بتدور في محجريهما زي ريشات الخلاطة) المهم أنها مفتحة ودي براها سلامة ..

تكلتو سرعة كدة وركبتو العربية ورقدت ليهو المقعد عشان يكون مرتاح لمن دورت بتاع البقالة قال لي .. : عليك الله طمني عليو .. قلت ليهو سمح !!

دورت سرعة كدة ووقفت في شارع الزلط قلت ليهو : إنت كويس يا زول !! إنت سامعني !! قول حاجة إنشاء الله (أح) عشان إطمن عليك !! ... صاحبنا قاطع موية ونور قلت احسن ادور أوديهو الحوادث للإسعافات الاولية ولي قدام بمشي معاهو ناس العظام والمخ والاعصاب والأذن والحنجرة !! في الطريق قال لي : موديني وين هسي !! قلت ليهو الحمد لله مخارج حروفك سليمة ودا معناتو ما في كسور في خشمك أو (قطوع) في لسانك .. موديك الحوادث يعني موديك وين ؟ قال لي لا لا وديني بيتنا انا داير أرتاح شوية ؟ قلت ليو : ترتاح من شنو ؟ ما إنت كنت مرتاح من جبيل يدك ساي ما رفعتها وزولك دا هو القام بي الشغل كلو ؟ قال لي بس إنت وديني بيتنا !!

 

حمدت الله لأنو في الحوادث كان حا يقولوا لي جيب أورنيك تمنية لانو الدكتور ما حا يصدق إنو صحبي مضروب في شكلة وأنا زااتي ما بقدر أقنعوا لأني زاااتي داير اليقنعني ..

وديت الزول بيتم ورقدتو في السرير .. كانت حالتو صعبة خلاص عريان من فوق و(هاف كاست) من تحت وريحتو الجبيل ديك اتغيرت بقت ريحتو طير طير .. والشعر الكان مجلط بي الدهان داك تاني لو كتبوهو ليهو ما بيقوم خليهو من التجلط ..

جبت ليهو موية يشرب قال لي داير منك طلب : قلت ليهو إنت أفتح خشمك وقول : قال لي توعدني ما توري زول بالحصل دا !!.. قلت ليو في دي ما معاك لاني لا زم أحكي لي لأي زول عشان تكون عبرة لمن يعتبر .. شابكني حبيبتي غزالة وحبيبتي رمانة .. هسي كدة كويس ؟

قال لي بعد تنهيدة : يا ابو النيز يا خي هاك الحكمة دي .:
أي غزالة اخوها اسد   .

 


                                  ©2010 - 2017 madeinsudan.net . All rights Reserved.

                            Alfsanf company. 3D panel Buildings experts

Powered by